Numri i të diplomuarve në sistemin universitar ka pësuar një rënie të ndjeshme përgjatë vitit akademik 2022-2023. Sipas të dhënave të Institutit të Statistikave, gjatë vitit që lamë pas janë diplomuar nga universitetet shqiptare në nivel Bachelor 13.8% më pak studentë se gjatë vitit paraardhës. Në shifra konkrete numri i të diplomuarve ishte vetëm 13 808 studentë.
Kjo gjë rrit frikën se në një të ardhme të afërt, vendi ynë do të përballet me mungesë të ekspertëve në shumë fusha të jetës. Faktori kryesor i uljes së numrit të të diplomuarve në Bachelor janë politikat e shpopullimit të kësaj qeverisje kundrejt të rinjve dhe studentëve që nuk kanë arsye të vazhdojnë ndjekjen e studimeve në vend.
Nga të gjitha programet e studimit, numri më i lartë i të diplomuarve është në programet e biznesit dhe administrim, e ndjekur nga inxhinieria dhe ndërtimi, e pasuar nga shëndetësi dhe mirëqënia.
Djemtë janë të përqëndruar në fushën e shërbimeve, inxhinierisë, ndërtimit, teknologjisë së informacionit dhe komunikimit. Për vajzat degët më të preferuara janë arsimi, shkenca natyrore, matematikë dhe statistikë, shkenca sociale, gazetaria dhe informacioni.
