Ditën e sotme Prokuroria e Posatçme ka përfunduar hetimet dhe ka çuar në gjykim çështjen e Plarent Ndrecës që akuzohet për “Shkelje të barazisë në tendera” në kohën që ai ka qenë Sekretar i Përgjithshëm i Ministrisë së Brendshme në lidhje me tenderat e zhvilluara për rindërtimin e katër komisariateve, atë të Vlorës, Mirditës, Pogradecit dhe numër 4 në Tiranë.
Kallëzimi kundër Plarent Ndrecës është bërë nga Kontrolli i Lartë i Shtetit ku sipas KLSH gjatë kontrollit u gjetën mospërputhje dhe devijime ligjore, si pasojë e shkeljeve të dispozitave ligjore në procedurat e prokurimit publik, të cilat kanë cënuar barazinë e pjesëmarrësve në tendera, gjithashtu ka pasur edhe rritje të paargumentuar të vlerës së kostove të ndërtimit dhe kostove të projektimit në procedurën e prokurimit.
Në fakt gjatë këtyre viteve Plarent Ndreca nuk ka qenë vetëm Sekretar i Përgjithshëm i Ministrisë së Brendshme por edhe kryetar i bordit të institucionit nën varësi të Erion Veliaj, Rezidenca Studentore Universitare nr.1 ku drejtoreshë është Anila Shehu e akuzuar për vjedhjen dhe shpërdorimin e fondeve publike. Bordi në të cilin Plarent Ndreca është kryetar në Qytetin Studenti sipas përcaktimeve ligjore ka detyrimin për monitorimin e shpenzimeve dhe ndërhyrjen në rast të keqpërdorimit të buxhetit të RSU nr.1.
Sipas të dhënave të Qendrës Kombëtare të Biznesit, rezulton se bordi i Rezidencës Studentore Universitare nr.1 në duart e Plarent Ndrecës, ka hartuar bilancet me “12 milionë Euro humbje”, ndërsa KLSH dhe auditetet e Bashkisë dhe të Ministrisë së Financave, kanë zbuluar 33 milionë Euro vjedhje me tendera e amortizime materiale. Mes tyre, vjedhjen e 7.2 milionë Euro në vit nga akomodimi studentëve dhe kontratat e qirave me privatët.
Prej 11 vitesh, Plarent Ndreca vazhdon drejton bordin e “Qytetit Studenti” periudhë gjatë të cilës, bashkë me drejtoreshën Anila Shehu kanë krijuar një gropë të zezë vjedhjesh me tenderë, kontrata qeraje gjoja me humbje, ku në fakt dihet tashmë edhe sipas akuzave në Prokurorinë e Tiranës rezulton se ka një vjedhje të madhe të fondeve publike.
Plarent Ndreca është prej vitesh një nga personat më të afërm dhe avokat i Erion Veliajt ku ky i fundit e ka vënë në krye të qarkut Lezhë me Partinë G99 kur Veliaj e drejtonte këtë forcë politike si krijesë e Lëvizjes MJAFT.
Nëse do të kishte realisht një drejtësi të pavarur nga pushteti Plarent Ndreca do të hetohej edhe për vjedhjet e kryera në Qytetin Studenti ku deri më tani përllogariten të jenë në shifrën e dhjetëra miliona eurove.
