Një studim së fundmi nga studiuesit e Universitetit Yale sugjeron se vaksinat kundër Covid-19 mund të kenë shkaktuar një gjendje të panjohur më parë, të quajtur “sindroma post-vaksinim” (PVS), tek një numër i caktuar i personave të vaksinuar.
Sipas studimit, simptomat përfshijnë lodhje ekstreme, vështirësi në ushtrime fizike, mpirje, mjegullim të trurit, pagjumësi, palpitacione, tringëllimë në veshë, marramendje, dhimbje muskulare dhe ndryshime biologjike në sistemin imunitar.
Në përmbledhjen e studimit theksohet se vaksinat kanë shpëtuar miliona jetë, por një pjesë e vogël e popullsisë ka raportuar vuajtje nga kjo sindromë. Sipas studiuesve, problemi kryesor është se PVS nuk njihet zyrtarisht nga autoritetet shëndetësore, duke kufizuar aksesin e pacientëve në trajtim dhe mbështetje mjekësore.
Imunologia dhe drejtuesja e studimit, Dr. Akiko Iwasaki, synon ta ndryshojë këtë situatë. Ajo tha për ‘Daily Mail’ se kërkimi shkencor do të vazhdojë dhe se nevojiten fonde për të zgjeruar studimin në një grup më të madh njerëzish për të konfirmuar gjetjet aktuale.
“Personat që vuajnë nga PVS janë ndjerë të injoruar sepse kjo gjendje nuk njihet si një problem mjekësor, besoj se kërkimi i thelluar shkencor do të çojë në diagnoza më të sakta, trajtime më të mira dhe vaksina më të sigurta.” u shpreh Dr. Iwasaki.
