Ish-drejtoresha e Kadastrës, Dallëndyshe Bici, u paraqit ditën e sotme në SPAK dha shpjegime në kuadër të hetimeve që po kryhen lidhur me grupin e strukturuar kriminal të Ergys Agasit dhe Ermal Beqirit i cili vepronte brenda Agjencisë Kombëtare të Shoqërisë së Informacionit (AKSHI).
Bici është thirrur nga prokurori Bledar Maksuti, ku sipas burimeve, ka dhënë shpjegime në lidhje me regjistrimin e një vile në periferi të Tiranës që është regjistruar nga ajo. Hetuesit kanë pyetur Bicin në lidhje me proçedurat e legalizimit dhe dokumentacionin hipotekor e regjistruar në emër të Ergys Agasit.
Ergys Agasi dhe Ermal Beqiri janë nën kërkim ndërkombëtar ndërsa në arrest shtëpie ndodhet ish-drejtoresha e AKSHI-t, Mirlinda Karcanaj dhe disa të dyshuar të tjerë që janë në masa më të lehta sigurie.
Agasi dhe Beqiri përmes kompanive të tyre ose që kontrollonin në mënyrë të tërthortë, kanë fituar miliona euro tendera në AKSHI ku merrnin peng dhe detyronin rivalët e tyre të tërhiqeshin nga gara, dyshime lidhen edhe me shtrirjen e këtij grupi edhe në institucione të tjera shtetërore si Policia e Shtetit.
