Deputeti i Partisë Demokratike Belind Këlliçi në një postim në rrjetin social Facebook ka akuzuar Drejtorin e Përgjithshëm të Policisë së Shtetit Skënder Hitaj si shërbëtor të qeverisë dhe jo të ligjit. Shkak është bërë pjesëmarrja e Hitajt në një aktivitet të qeverisë për përurimin e një rruge në fshatin Zogaj të Shkodrës nën praninë e zyrtarëve të qeverisë dhe zëvendës-kryeministres Albana Koçiu.
Këlliçi e cilësoi aktivitetin si ‘aktivitet tipik elektoral’ ku edhe vetë ministri i linjës Besfort Lamallari nuk ishte prezent në këtë aktivitet.
“Ç’punë ka Drejtori i Përgjithshëm i Policisë në një përurim rruge, në një event elektoral, propagandistik të qeverisë?!” – ka shkruar Belind Këlliçi në postimin e tij.
Postimi i plotë:
“Në një aktivitet tipik elektoral dhe propagandistik, me ato videot e bëra gati në montazhin e Edi Ramës, mediat dhe publiku u njohën me punën e madhe që po bëhej në Zogaj!
Ajo që bën përshtypje, është se në krah të Karakaçit e Koçiut, në atë ecjen me regji, në krah të tyre është Drejtori i Përgjithshën i Policisë së Shtetit, Skënder Hita.
Pyetja është e thjeshtë: Ç’punë ka Drejtori i Përgjithshëm i Policisë në një përurim rruge, në një event elektoral, propagandistik të qeverisë?! Çfarë do aty Skënder Hita, kur nuk është as Ministri i linjës dhe drejton një institucion teorikisht të depolitizuar?!
Kjo që pamë sot nuk është rastësi. Është e qartë se kemi të bëjmë me një drejtues policie që më shumë se shërbëtor i ligjit dhe qytetarëve, është shërbëtor i qeverisë, i rilindjes dhe interesave të saj.”
