Pas rreth 4 orësh dëshmi në Prokurorinë e Posaçme (SPAK), ministrja e Arsimit dhe Sportit, Mirela Kumbaro, u shpreh se ishte thirrur në cilësinë e “personit në dijeni” për çështjen e stadiumit “Air Albania”. Kumbaro bëri një deklaratë të shkurtër për mediat por nuk dha detaje të mëtejshme mbi natyrën e pyetjeve apo çështjes që po hetohet. Kjo paraqitje shënon herën e parë që Kumbaro thirret të dëshmojë pranë prokurorëve të posaçëm.
“Isha në cilësinë e personit në dijeni për një çështje që ka të bëjë me stadiumin Air Albania.” – është shprehur Kumbaro për mediat pasi doli nga ambientet e SPAK.
Ndërkohë, stadiumi “Air Albania” vazhdon të mbetet në qendër të vëmendjes jo vetëm sportive, pasi FSHF e ka cilësuar atë një model suksesi në rajon. Partneriteti i tij me kompaninë ajrore kombëtare u rinovua së fundmi për pesë vite të tjera.
