Në Bulqizë, mbledhja e Këshillit Bashkiak e planifikuar për të enjten, 30 prill 2026, ka dështuar totalisht për shkak të kundërshtimit të banorëve të fshatit Gjoricë. Rreth 80 kryefamiljarë janë mbledhur për të ndaluar diskutimin mbi dhënien me qira të tokave të tyre për ndërtimin e paneleve fotovoltaike, ndërsa drejtuesit e këshillit e kanë anuluar mbledhjen pa paralajmërim. Banorët kërkuan të hynin në sallë për të ndjekur seancën, por nuk u lejuan gjithashtu anëtarët e opozitës, të cilëve iu tha se seanca ishte shtyrë për një ditë tjetër. Përveç kësaj, prania e forcave të policisë e ka tensionuar situatën, pasi është penguar hyrja e banorëve dhe këshilltarëve.
Banorët e Gjoricës e kundërshtojnë projektin sepse ai rrezikon të shkatërrojë kullotat që i kanë mbajtur gjallë për breza. Ata janë shprehur se marrja e kullotave për panele diellore është njësoj sikur t’u merrej buka e gojës, duke vënë në rrezik të gjithë blegtorinë dhe burimin e tyre kryesor të jetesës. Mbi 80 kryefamiljarë kanë firmosur një ankesë drejtuar Bashkisë Bulqizë dhe ministrive përkatëse, duke kërkuar që të mos lejohet asnjë formë zaptimi i asaj që ata e konsiderojnë “mera e fshatit“. “Kjo është e vetmja kullotë që ka fshati. Nëse merret për panele, bagëtitë mbeten pa hapësirë dhe familjet tona pa burimin kryesor të jetesës”, thuhet në këtë ankesë.
Ankesa e banorëve ngre edhe akuza serioze për parregullsi dhe mungesë transparence gjatë procesit të miratimit. Sipas tyre, firmat mbështetëse të projektit janë mbledhur nga persona që as që jetojnë në fshat, çka ka rritur mosbesimin ndaj autoriteteve lokale. Banorët kërkojnë që Këshilli Bashkiak ta anulojë vendimin për dhënien me qira të tokave shtetërore dhe të organizohet një proces i rregullt dhe transparent. Mësohet se pas këtij projekti mund të qëndrojë biznesmeni Marin Gjonaj, i cili po përfiton toka kullotash duke shfrytëzuar lidhjet e tij me qeverinë.
