Ish-banori i “Big Brother“, Donald Veshaj, është përfshirë në një polemikë të re pasi kompania e tij ka aplikuar për ndërtimin e një kulle gjigante në qendër të Vlorës. Projekti ambicioz parashikon një objekt rezidencial dhe hotelerie me 33 kate mbi tokë dhe 4 kate nëntokë. Kjo lëvizje e papritur e humoristit në botën e ndërtimit ka ngjallur ironi dhe dyshime të shumta në opinionin publik. Lajmi është bërë i ditur pasi dokumentet e projektit janë depozituar në Këshillin Kombëtar të Territorit.
Kompania “DGC” shpk u themelua në mars të vitit 2024 nga Donald Veshaj dhe Glenis Çobo. Në dhjetor të po atij viti, shoqëria “Anchor Investment” e Albi Shytit bleu 50% të aksioneve të kësaj kompanie për vlerën simbolike prej vetëm 5 mijë eurosh. Pas këtij bashkimi, tre ortakët depozituan së bashku aplikimin për lejen e ndërtimit të kullës në Vlorë. Projekti u regjistrua në rendin e ditës së Këshillit Kombëtar të Territorit në pikën 50, çka tregon se ai ka kaluar fazat e para administrative.
E gjithë kjo procedurë ndodh në një kontekst ku Këshilli Kombëtar i Territorit drejtohet nga vetë Kryeministri Edi Rama. Ky fakt ka ngritur menjëherë akuza dhe dyshime për favore dhe lidhje të dyshimta mes figurave publike dhe pushtetit. Kujtojmë se e njëjta kritikë është bërë edhe për raste të tjera, si për shpalljen e aktorit Gazmend Paja “investitor strategjik” apo për lehtësitë e dhëna nga ana e ish-kryebashkiakut të arrestuar, Erion Veliaj. Në këtë preçedent, aplikimi i Donald Veshajt perceptohet nga shumëkush si një privilegj i ri që i jepet një personazhi tjetër nga bota e showbizit në sektorin e ndërtimit.
Vendimi i Këshillit Kombëtar të Territorit për këtë projekt, i shqyrtuar në mbledhjen e 29 Prillit 2026, pritet të bëhet publik nga Agjencia e Zhvillimit të Territorit në javët në vijim. Deri në atë moment, mbetet e paqartë se çfarë vendimi ka marrë kryesuesi i KKT-së, Edi Rama, për këtë aplikim që përfshin një investim kaq të madh. Për të njëjtën arsye, ende nuk janë të disponueshme detaje të plota lidhur me vendndodhjen e saktë apo afatet kohore të ndërtimit.
Analistët e çështjeve të territorit theksojnë se Vlora po përballet me një presion të jashtëzakonshëm ndërtimor, pa planet e duhura urbane. Sipas tyre, lejimi i një kulle 33 katëshe në një zonë jo të përcaktuar qartë do të krijonte precedent të rrezikshëm.
