Ka nisur në ambientet e Gjykatës së Posaçme kundër Korrupsionit dhe Krimit të Organizuar (GJKKO) gjyqi i radhës për dosjen “Veliaj”, ku në cilësinë e të pandehurit është paraqitur biznesmeni Elman Abule. Ai po procedohet nën masën e sigurisë “arrest shtëpie”, ndërsa në seancë është shoqëruar nga bashkëshortja e tij. Para fillimit të seancës, avokatja e Abule, Romina Zano, ka paraqitur një kërkesë formale për ndarjen e çështjes së klientit të saj nga pjesa tjetër e dosjes së kryebashkiakut Erion Veliaj.
Mbrojtja ligjore e biznesmenit pretendon se veprat penale për të cilat ai akuzohet nuk janë të juridiksionit të GJKKO-s, duke kërkuar shpalljen e mos-kompetencës lëndore dhe kalimin e çështjes në një gjykatë tjetër. Konkretisht, Elman Abule akuzohet nga SPAK për veprën penale të “Pastrimit të produkteve të veprës penale ose veprimtarisë kriminale”, e kryer në bashkëpunim më shumë se një herë. Sipas aktakuzës, këto veprime janë kryer në emër të shoqërisë tregtare “Rametal” shpk, e cila zotërohet nga i pandehuri.
Paralelisht me këtë kërkesë, Elman Abule ka kërkuar edhe gjykim të shkurtuar, duke shprehur gatishmërinë për të shqyrtuar shpejt çështjen e tij. Kjo praktikë e gjykimit të shkurtuar është pranuar nga GJKKO për të pandehurit e tjerë në këtë dosje, pasi dosja ndaj kryebashkiakut Veliaj është ndarë në dy pjesë. Gjyqi vijon në GJKKO, ndërsa pritet që në seancat e ardhshme gjykata të vendosë mbi kërkesën për ndarjen e çështjes së biznesmenit Abule dhe të shprehet lidhur me kompetencën për ta gjykuar atë.
