Kryeministri Edi Rama ka reaguar ndaj kërkesës publike për dorëheqjen e tij, duke i drejtuar institucionet e sigurisë ndaj kritikut të tij, Dritan Goxhajt. Mësohet se Goxhaj është thirrur ditën e mërkurë në Policinë e Shtetit dhe është marrë në pyetje nga oficerët e njësisë së Antiterrorit. Ky veprim vjen pas një deklarate të bërë nga Goxhaj më shumë se 5 muaj më parë në emisionin “Quo Vadis”, ku ai foli për rotacion përmes “plumbit”. Megjithatë, thirrja në polici ndodh pikërisht në kohën kur Goxhaj ndodhet në qendër të sulmeve të vazhdueshme nga kryeministri dhe ministrat e tij.
Antiterrori, i shtyrë edhe nga presioni politik i momentit, e ka parë të arsyeshme ta marrë në pyetje Goxhajt, i cili pas procedurave është lënë sërish i lirë. Ende nuk dihet se për çfarë vepre penale është nisur hetimi, por kjo njësi bashkëpunon ngushtë me Shërbimin Informativ Shtetëror dhe Prokurorinë e Posaçme SPAK. Nëse do të ketë një dosje penale kundër tij, ajo mund të regjistrohet në SPAK në ditët në vijim. Ky veprim ngre shqetësime për përdorimin e institucioneve të sigurisë ndaj kritikëve të pushtetit.
Reagimi i Ramës dhe ndërhyrja e Antiterrorit ndaj Goxhajt tregon një tension të shtuar politik në vend. Thirrja në polici për një deklaratë të vjetër publike lë hapur pyetjen nëse ky ishte një akt intimidimi apo një hetim “serioz”. Ndërkohë, roli i SPAK-ut mbetet kyç, pasi dosja e mundshme do të kalonte në duart e tij. Ky zhvillim vjen në një moment kur kërkesa për dorëheqjen e kryeministrit po përforcohet në opinionin publik.
