Protesta kundër qeverisë hyn sot në ditën e 99-të, me qytetarët që pritet të rikthehen para godinës së Kryeministrisë për të vijuar tubimet. Pas afro 100 ditësh, kërkesa thelbësore e protestuesve mbetet e pandryshuar: dorëheqja e Edi Ramës, largimi i qeverisë dhe formimi i një kabineti tranzitor. Një tjetër shqetësim kyç lidhet me disa ligje të miratuara, ku ata kërkojnë tërheqjen e ligjit për investimet strategjike dhe atij për zonat e mbrojtura. Këto dy ligje kanë qenë prej kohësh në qendër të kundërshtimeve nga qytetarët dhe grupet opozitare.
Në prag të nisjes së sesionit të ri parlamentar, protesta pritet të marrë një formë tjetër, me një përshkallëzim të paralajmëruar për datën 8 shtator. Protestuesit kanë bërë të ditur se do t’i presin deputetët e mazhorancës me vezë, si shenjë revolte ndaj tyre. Organizatorët dhe pjesëmarrësit deklarojnë se nuk kanë ndërmend ta ndërpresin qëndrimin në shesh. Sipas tyre, protesta do të vijojë pa u ndalur derisa të realizohet plotësisht kërkesa për ndryshimin e qeverisjes dhe largimin e kabinetit aktual.
