Studentët e mjekësisë i janë drejtuar me një padi Gjykatës Evropiane të së Drejtave të Njeriut, lidhur me ligjin e miratuar nga qeveria që i detyron ata të punojnë disa vite në Shqipëri pas përfundimit të studimeve. Ata kërkojnë shfuqizimin e këtij ligji të cilin e konsiderojnë të padrejtë, dhe për këtë kanë paditur shtetin Shqiptar. Më përpara studentët kanë zhvilluar protesta të shumta në Tiranë, duke braktisur dhe auditorët!
Madje ata e kanë ndjekur çështjen në rrugë gjyqësore, por vendimi që Gjykata Kushtetuese dha në muajin shkurt 2024 për uljen e viteve të punësimit me detyrim në Shqipëri, duket se i ka lënë studentët e pakënaqur përsëri.
Asokohe gjykata vlerësoi se afati 5-vjeçar i punësimit të detyruar e tejkalon periudhën e nevojshme, madje bazuar në përvojën e vendeve të tjera asnjë shtet nuk mund t’i mbajë studentët më shumë se sa gjysmën e kohëzgjatjes së studimeve. Gjykata kërkoi ndryshim të ligjit dhe për afatet e tjera 3 dhe 2-vjeçare të punësimit të detyruar!
Por pavarësisht këtij vendimi studentët nuk ishin dakord përsëri, duke kërkuar që ta zgjedhin vetë vendin ku duan të ushtrojnë profesionin e tyre.
Sipas ligjit në fuqi, studentët që refuzojnë nënshkrimin e kontratës do të duhet që të paguajnë një vlerë pesëfish sa vlera reale e studimeve të tyre në formën e sanksionit.
