Gazetari Klodian Tomorri, i ftuar në emisionin “Të Paekspozuarit” në MCN TV, foli për hetimet në lidhje me inceneratorin e Tiranës.
Tomorri deklaroi se rreth 140 milionë euro janë paguar për inceneratorin që nuk ekziston, dhe se ka zero shanse rikuperimi të parave. Gazetari tha se SPAK ka kryer hetime kaotike dhe ende nuk ka zyrtarë të lartë përgjegjës.
“Hetimi inceneratorit të Tiranës ka qenë i ngadaltë dhe kaotik. Por ka disa zhvillime, siç ishte kontrolli në shtëpinë e kryebashkiakut, i cili nuk bëhet pa patur një argumentim. Qytetarëve u duhet thënë se ato lekë që janë paguar për inceneratorin, rreth140 milionë euro kanë ikur tashmë, ka zero shanse rikuperimi mbrapsht. Madje prej një viti e ca që kur ajo u sekuestrua dhe u mor në administrim nga shteti ajo vijon të punojë për të mbushur gropat që ishin lënë nga kompania e dyshes Mërtiri-Zoto si kredi të papaguara nga banka, detyrime të papaguara tatimore dhe shumë të tjera te furnitorët.
Në finale ato para nuk arriti as SPAK t’i kthejë mbrapsht apo që t’i ndalonte që të vidheshin dhe sigurisht as qeveria e cila ka qenë aktore, sepse ka qenë autorja e kësaj historie.”– deklaroi Klodian Tomorri.
