Partia Socialiste ka organizuar pak ditë më parë Kuvendin Kombëtar Rinor, ku fjalimet e të rinjve socialistë i rrëmbyen vëmendjen dhe fjalimit të vetë kreut të kësaj partie Edi Ramës.
Fjalimet e tyre flisnin për arritjet e partisë dhe udhëheqësit e saj, duke premtuar se do të punojnë pa u lodhur për të çuar përpara vizionin socialist në zgjedhjet e ardhshme parlamentare të vitit 2025. Disa prej tyre e lartësuan PS-në aq sa e krahasuan me sistemin diellor.
“Në trurin tim, PS-ja funksionon si një orbitë, si një sistem diellor, si dielli që ka gravitetin dhe sjell planetet. Dhe ne sillemi rreth diellit me gravitet.” – tha një prej të rinjve.
Autori i këtij mesazhi, i riu Andon Gjoni, është shpërblyer sigurisht për fjalët që kishte zgjedhur të thonte në Kuvendin e 1 shkurtit.
Ernest Rakaj, kryetari i Këshillit Bashkiak të Lezhës, përmes një postimi në rrjetet sociale ka njoftuar se Gjoni, vetëm dy ditë pas fjalimit “mbrëselënës” u emërua administrator i njësisë Shënkollë në Lezhë.
“Sot me Zv. Kryetaren Brikena Vuksani ne Njesine Shenkolle për ti dorëzuar stafetën ne krye ne punëve në zonë Andon Gjoni! I uroj shumë suksese Andonit në detyrën e re në shërbim të një zone të mrekullueshme dhe me njerëz të jashtëzakonshëm.” – thuhet në postimin e Rakaj.
Mesa duket vetëm kaq duhet për të marr një post në administratën shqiptare. Një lavdërim për Partinë Socialiste dhe asnjë meritë për vendin e punës që merr.
