Kledian Leka është 23-vjeçari i parë i diplomuar me probleme të shikimit në Fakultetin e Shkencave Kompjuterike në Universitetin e Parmës. 23-vjeçari me origjinë shqiptare e banim në Casalmaggiore ka përfunduar me sukses kursit trevjeçar të titulluar “Edukimi i Shkencave Kompjuterike për nxënësit të cilët kanë probleme në lidhje me shikimin.”
Klediani tha se teza e tij synon të jetë një ndihmë e madhe për fëmijët me probleme me shikimin. Ai tha se ka punuar për këtë tezë që të gjitha dokumentet tradicionale të jenë të lexueshme edhe për të verbërit.
“Teza ime mund të jetë një manual për të ndihmuar fëmijët me dëmtime të plota ose të pjesëshme të shikimit. Nuk kishte materiale mësimore për nxënësit e verbër, kështu që u nisa për të përkthyer dhe konvertuar të gjitha dokumentet tradicionale mbi të cilat ata studionin, në mënyrë që ato të ishin edhe të lexueshme për ne të verbërit. Nga sot Universiteti i Parmës dhe ndoshta universitete të tjera, do të kenë një pikënisje me të cilën do të krahasohen dhe nga e cila do të marrin frymëzim për të përmirësuar aksesin. Vazhdova të punoja nga ora 08:00 deri në 13:00. Pastaj, nga ora 14:00 deri në 2:00 u angazhova për të studiuar. Nuk kam menduar kurrë të ndalem dhe të ndjej keqardhje për veten time dhe vendosa të luftoj për të realizuar të gjitha ëndrrat e mia.” – ka deklaruar Kledian Leka.
Shqiptari është diplomuar si ekspert IT me nota të larta dhe deri në vitin 2020 ka bashkëpunuar me Muzeun Bijou të Casalmaggiore për të krijuar itinerare për të verbërit. Ai është i regjistruar në regjistrin kombëtar të mësuesve të IT dhe është kualifikuar për të trajnuar atletë të verbër pasi ai ushtroi atletikën në nivel garues për dy vjet.
