Teksa viti i ri akademik është duke hyrë dhe studentët po përgatiten për të përmbushur nevojat bazike. Kostot dhe mënyra e jetesës në Shqipëri për studentët nga viti në vit rriten duke bërë të papërballueshme jetesën për shumë studentë. Gjithashtu kushtet për studentët në Shqipëri janë përditë e më të këqija si ato të akomodimit për shkak të vjedhjes dhe korrupsionit të përditshëm nga institucionet përgjegjëse.
Këto ditë pranë platformës Studentët Denoncojnë kanë mbërritur me dhjetëra shqetësime të studentëve që kërkojnë të akomodohen pranë konvikteve dhe që janë detyruar të paguajnë 6 muaj paradhënie për t’u akomoduar. Kjo vjen si pasojë e vjedhjes që ka ndodhur gjithë këto vite ku institucionet nën varësi të Bashkisë Tiranë kanë dalë me humbje të mëdha në deklarimet financiare që kanë bërë pranë QKB dhe për të mbuluar vjedhjet po detyrohen studentët të paguajnë akomodimin për disa muaj ku tarifat nuk justifikojnë as kushtet minimale që konviktet duhet të kenë për studentët.
Në Kosovë, Qendra e Studentëve në Prishtinë këtë vit është me kushtet e përmirësuara që ofrohen për studentët. Kostoja minimale në muaj është vetëm 35 euro, nga këto 20 euro për akomodimin dhe vetëm 15 euro në muaj për mensën me tre vakte në ditë. Siguria dhe cilësia vjen çdo vit duke u përmirësuar duke bërë kontrastin me konviktet në Tiranë ku platforma Studentët Denoncojnë ka ngritur shqetësimin në mënyrë të vazhdueshme sidomos për Qytetin Studenti.
Kosova është duke shënuar rritje në cilësinë e jetesës për studentët dhe të rinjtë në nivelet e Bashkimit Europian, e kundërta po bëhet në Shqipëri ku pushteti gjithnjë po sillet në mënyrë rraciste ndaj studentëve dhe të rinjve ku një vit më parë Kryetari i Bashkisë së Tiranës Erion Veliaj ofendoi studentët në gjuhë diskriminuese ndaj tyre.
