Detaje të reja janë zbardhur në lidhje me të shkuarën e autorit të vrajses së 50-vjeçarit, Alfred Dedja. 27-vjeçari, Julian Gjoshi ekzekutoi ditën e sotme me dy plumba Dedjan ndërsa mësohet se ai nuk është emër i panjohur për policinë. Gjoshi në vitin 2021 u arrestua për armëmbajtje pa leje ndërsa ky arrestim vuri në “lëvizje” të afërmit e tij që të dilte nga burgu. Gjoshi është kunat i Altin Hajri ndërsa ai është një person i njohur në botën e krimit ndërsa ka patur lidhje edhe me ish-deputetin, Jurgis Çyrbja. Një bisedë e zbardhur në “SKY ECC” mes Altin Hajrit dhe ish-deputetit socialist është zbuluar se si Julian Gjoshi arriti ti shpëtonte burgut.
Hajri i kishte kërkuar ndihmë Çyrbes për lirimin apo ndryshimin e masës së sigurimit personal për njërin nga të arrestuarit, kundrejt ofrimit dhe të shumave monetare, duke sugjeruar, ndryshimin e personit që posedonte armën pa leje dhe dëmtimin e gjilpërës së armës së zjarrit, përpara kryerjes së ekspertimit nga policia shkencore. Ky veprim kërkohej me qëllim përjashtimin e kunatit të Altin Hajrit, Julian Gjoshi nga përgjegjësia penale, duke nxjerë pistoletën të paaftë për të bërë qitje në testin e ekspertimit balistik që do bënte policia.
“…kan kap kunotin tim me pistoletë… Mos bëjmë naj gjë. Është kunati me gjith atë “bolin” që rrin aty ke unë. Paktën ta maj një dali nji, shif naj “arrest shpia”. Sa lek dun veç ta qisim. Me fol direkt, se dun kap tani. Se mos bëjnë provën. Japim 10 mijë euro veç të na e prishi atë mrrokllën (Pistoletën)…”.
Më pas, Altin Hajri shprehet se është i gatshëm të paguajë akoma më shumë që çështja të mbyllet ndërsa nuk harron ti dërgojë të fala mikut të Çyrbes të cilin e quan Olsi.
“…se arma qeka veç për gishtat…se po se marove ti s’kam kujt me i thën, me veç prish gjëlponën. Kërkoje vëlla, sa lek të dojn veç du t’ja maroj se më mytën kalamajt daja…. Jepi 20 mijë euro sa dojn ai, veç ta mbarojë…. Më 21 del në gjyq. Faleminderit dhe prej teje, të fala bëj Mikut tat Olsit…”.
Gjykata vendosi 21 ditë burg për Gjoshin edhe pse ishte arrestuar me një armë luftarake në makinë. Argumentimi i gjykatësit ishte se nuk kishte dalë ende rezultati i aktit të ekspertimit balistik të pistoletës së sekuestruar nga policia. Vonesa e aktit të ekspertimit bëri që gjyqi ndaj Gjoshit të zhvillohej teksa ai ishte i lirë. Në bisedat e tjera të zbardhura Hajri falenderoi ish-deputetin si edhe një prokuror me emrin Olsi. Më tej nga bisedat i la porosi Çyrbjes t’i merrte masat teksa shtoi tia merrte me stil dhe ti qepte dy kostume dhuratë.
“…Ok shum mirë ke bë, meri masat me stil t’ja mar, ja dy Kustume…” – i shkruan Jurgis Çyrbes, Altin Hajri. Ndër të tjera personi në kërkim Hajri i shkruan, Jurgis Çyrbjas, si më poshtë vijon:
“…ma kanë dhonë fjalën, veç po presin një letër porosi dhe jam “ok” vëlla. Ka mundësi ai se është burri mirë ky tani, që është Ministër vlla. E ka shum shok me than shife vet aman, se më prishin shumë punë, se po i rregulloj ishalla këtë muaj që vjen. Dhe Ols, e ka bo punën e vet vëlla, thuaj faleminderit shum thuj…. Mos harro se e ka bo punën e vet se i kishte thonë avokatit, është porosia shefit. Për Ols vëlla, plus ka qën ke avokati vet 2 herë, e ka bo punën e vetë. A kupton ça po të them. Për atë mikun tat që pate shku ti po të them takoje, thuj falemindërit dhe më bjerë masat t’i boj nja dy kustume që t’ja çosh. Po për zotin është porosia shefit, kishte thënë avokati i kishte thon dum avokat po për zotin e mall e ka bë të vetën. Më tha avokati, e ka bo si burrat ai tha se ai nuk përzihet tha, se avokati e ka robin e vet ai, rrofsh vëlla. Shif aman të bojnë ca ndryshime këtu ke lagja dhe ja dy vene tjera që ti marim 100 për 100. Ok shum mirë ke bë, meri masat me stil t’ja mar, ja dy Kustume…”.
Brenda 21 ditëve në gjykatë shkoi akt-ekspertiza e armës që iu kap Julian Gjoshit dhe ajo rezultoi e rregullt. Në lidhje me çështjen prokurori kërkoi dënimin me 4 vite burg por gjykatësja, Shefkie Demiraj e konvertoi dënimin me 3 vjet shërbim prove. Pas vendimit Julian Gjoshi doli nga burgu. Ndërkohë tani në 2024 Gjoshi ka kryer një vepër penale akoma më të rëndë atë të vrasjes.
