Zyra kundër mashtrimit Ekonomik në BE, OLAF ka zbardhur skemën korruptive të shpërndarjes së fondeve të BE-së për fermerët në Shqipëri pas hetimeve të disa muajve më parë që çuan në ndërprerjen e granteve.
Në raportin vjetor për vitin 2024, OLAF tregon se pas një sërë hapash komplekse hetimore përfshirë përdorimin e teknikave dhe kërkimeve shkencore dixhitale të dokumenteve të lidhura me marrësit e IPARD II, AZHBR dhe operatorë të tjerë ekonomikë, zbuloi disa parregullsi serioze gjatë fazës së dhënies së granteve dhe zbatimit të disa projekteve.
Sipas OLAF, fermerëve u merreshin në formën e ryshfetit pjesë të konsiderueshme të granteve përmes kompanive të konsulencës të përzgjedhura paraprakisht. Ndërkohë që në shumë raste përfituesit e fondeve përzgjidheshin me konkurse të manipuluara. Aplikantëve u kërkohej të paguanin një pjesë të konsiderueshme të grantit të tyre tek një kompani konsulencë lokale. Në raste të tjera kontratat janë dhënë pa konkurrencë ose përmes një konkursi të manipuluar me oferta falsë ndërkohë që në disa projekte u gjetën çmime të fryra dhe shkelje të rregullave kontraktuale.
Pas konstatimit të këtyre shkeljeve, OLAF i ka propozuar BE-së që të ndalojë programin mbështetës për bujqësinë shqiptare IPARD III me një vlerë 112 milion euro deri në momentin kur të merren masa që fondet e BE-së të mbrohen nga vjedhja dhe aktivitetet ilegale.
Skandali i Ministrisë së Bujqësisë të drejtuar asokohe nga Frida Krifca lidhur me keqpërdorimin e fondeve të IPARD nisi të zbulohej pasi disa fermerë që aplikuan për këtë mbështetje bënë denoncim ndaj zyrës shqiptare për mënyrë korruptive të ndarjes së eurove.
