Policia e Tiranës përfundoi operacionin e koduar “Barriera”, i cili synonte goditjen e veprimtarive të paligjshme. Gjatë kontrolleve u zbuluan gjashtë lokale ku luheshin lojëra fati në zona të ndryshme të kryeqytetit. Disa prej këtyre ambienteve ndodheshin edhe në afërsi të shkollave. Ky operacion përbën një hap të rëndësishëm në ndalimin e aktiviteteve të tilla të jashtëligjshme.
Në kuadër të operacionit, tetë persona u arrestuan në flagrancë teksa vendosnin baste përmes telefonit. Autoritetet sekuestruan pajisje DVR dhe nëntë celularë me faqe aktive për lojëra fati. Materialet procedurale iu referuan Prokurorisë për veprime të mëtejshme. Hetimet vijojnë për të identifikuar përgjegjësit e tjerë të mundshëm.
NJOFTIMI:
Tiranë
Strukturat e Drejtorisë Vendore të Policisë Tiranë vijojnë kontrollet dhe veprimet intensive për garantimin e sigurisë në dhe pranë institucioneve arsimore, si dhe për evidentimin dhe goditjen e veprimtarive të paligjshme që zhvillohen në këto zona.
Finalizohet operacioni i koduar “Barriera”. Zbulohen 6 lokale ku luheshin lojëra fati.
Vihen në pranga 8 shtetas dhe sekuestrohen 10 pajisje. Si rezultat i veprimeve hetimore, të kryera me metoda proaktive, nga specialistët e Seksionit për Hetimin e Mashtrimeve Kibernetike, në koordinim me Prokurorinë, me objektiv parandalimin dhe goditjen e rasteve të përshtatjes së lokaleve, veçanërisht atyre në afërsi të institucioneve arsimore, për lojëra fati ilegale, me celularë, kompjuterë dhe/ose makineta, u finalizua në bashkëpunim me shërbimet e Komisariatit Nr. 2 dhe me shërbimet e Forcës së Posaçme Operacionale, operacioni i koduar “Barriera”.
Në kuadër të këtij operacioni u zbulua se në 6 lokale në zona të ndryshme të kryeqytetit, në afërsi të shkollave, viheshin baste sportive, me celularë. Për këto raste u arrestuan në flagrancë shtetasit M. M., 20 vjeç dhe S. A., 23 vjeç, punonjës në 2 prej lokaleve, si dhe shtetasit D. V., 24 vjeç; B. Ç., 42 vjeç; E. S., 43 vjeç; A. D., 26 vjeç; E. B., 24 vjeç dhe O. A., 21 vjeç, të cilët u kapën në flagrancë në ambientet e subjekteve, duke vënë baste.
Me cilësinë e provës materiale u sekuestruan nga këto ambiente, pajisje DVR dhe 9 celularë me faqe aktive për lojëra fati.
Hetimi dhe kontrollet vijojnë për të identifikuar dhe nxjerrë përpara përgjegjësisë penale, shtetas të tjerë që mund të jenë përfshirë në këtë veprimtari të kundërligjshme. Materialet procedurale iu referuan Prokurorisë, për veprime të mëtejshme.
