Politikat e qeverisë vitet e fundit kanë detyruar largimin e shumë familjeve nga vendi dhe për pasojë uljen e numrit të nxënësve dhe të studentëve për vitin e fundit akademik.
Sipas të dhënave zyrtare të INSTAT-it në vitin shkollor 2023-2024, u regjistruan në arsimin zyrtar 533.711 mijë nxënës dhe studentë, me një ulje prej 3.7% krahasuar me vitin shkollor 2022-2023. Në vitin shkollor 2023-2024, u regjistruan në arsimin para-universitar (deri të mesëm të lartë) 416.538 mijë nxënës dhe fëmijë, duke shënuar një ulje prej 3.8% krahasuar me vitin shkollor 2022-2023. Në arsimin parashkollor, gjatë këtij viti shkollor marrin pjesë gjithsej 66.711 mijë fëmijë, 4.4% më pak krahasuar me vitin e kaluar shkollor.
Në arsimin 9-vjeçar, u regjistruan 258.072 nxënës, 54.7% në arsimin fillor dhe 45.3% në ciklin e lartë të arsimit bazë. Krahasuar me vitin shkollor 2022-2023, marrin pjesë në arsimin 9-vjeçar 3.4% më pak nxënës.
Në vitin shkollor 2023-2024, 88.7% e nxënësve të arsimit 9 vjeçar u regjistruan në institucionet e arsimit publik dhe 11.3% në institucionet e arsimit privat. Ndër nxënësit e regjistruar në arsimin 9 vjeçar, vajzat përbëjnë 47.9% të totalit.
Në vitin shkollor 2023-2024, u regjistruan në arsimin e mesëm të lartë 91.755 mijë nxënës, duke shënuar një ulje prej 4.3%, krahasuar me vitin e kaluar shkollor.
Në vitin 2023-2024, pjesën më të madhe të nxënësve të regjistruar në arsimin e mesëm të lartë e përbëjnë nxënësit e gjimnazit dhe të arsimit të mesëm social-kulturor prej 82.1%.
Ky proporcion ka mbetur pothuaj në të njëjtin nivel përgjatë tre viteve të fundit. Pjesa më e madhe e nxënësve të regjistruar në arsimin e mesëm të lartë ndjek arsimin në institucionet arsimore publike (85.0%).
Në vitin shkollor 2023-2024, numri i mësuesve në arsimin 9 vjeçar është 24.109 mijë, ndër të cilët 78.0% janë gra.
Në arsimin pas të mesmes jo të lartë, në vitin shkollor 2023-2024 u regjistruan 179 nxënës. Femrat përbëjnë 39.7% ndërsa meshkujt 60.3%. 71.5 % e tyre ndjekin kualifikimin “Ndërmjetësim ë Pasurive të Paluajtshme”, 17.9% “Teknologji Automatizimi” dhe 10.6% “Dizajn dhe Modë”.
Në vitin akademik 2023-24, vazhdojnë studimet në të gjithë programet e arsimit të lartë 116.994 mijë studentë, duke shënuar një ulje prej 3.6% krahasuar me 2022-2023.
Studentët që marrin pjesë në arsimin e lartë publik, përbëjnë 72.3% të numrit total të studentëve. Në të gjithë programet e arsimit të lartë, në vitin akademik 2023-2024, marrin pjesë 68.305 mijë studente femra ose 58.4% e numrit të përgjithshëm të studentëve në arsimin e lartë. Në programet bachelor për të njëjtën periudhë morën pjesë në arsimin e lartë 67.283 mijë studentë duke shënuar një ulje prej 5.5% krahasuar me 2022-2023.
Në vitin akademik 2023-2024, ashtu si edhe vitin e kaluar akademik, studentët preferojnë fushën e studimit “Biznes, Administrim dhe Ligj”, ku është përqendruar një e katërta e numrit gjithsej të studentëve.
