Në 2 Korrik Këshilli Kombëtar i Territorit ka pasur një axhendë për miratimin e dhënies së lejes për ndërtimin e disa kullave shumëkatëshe dhe ndërtimin e disa godinave në Bashkinë e Tiranës. Një nga lejet e dhëna është edhe leja për ndërtimin e Kolegjit Europian të Tiranës në formën e një Kampusi Universitar me 8 kate mbitokë dhe 3 kate nëntokë ku proçedura sipas informacioneve të publikuara në media do të merret përsipër nga Fondi Shqiptar i Zhvillimit.
Ajo që vihet re nga postimt e Erion Veliajt në faqen e tij në 26 Janar, është se këto proçedura kanë nisur më herët nga Bashkia e Tiranës ku Godina Iliria është përdorur në mënyrë private përkohësisht nga Kolegji Europian i Tiranës pa asnjë proçedurë transparente për publikun.
Godina Iliria është pronë publike nën menaxhimin e Universitetit të Tiranës dhe Bashkisë Tiranë ku kjo godinë është përdorur vetëm për aktivitiete por jo në shërbim të studentëve gjatë këtyre viteve.
Gjatë vizitës së Rektores së Kolegjit Europian Federica Mogherini, Edi Rama dhe Erion Veliaj kanë premtuar ndërtimin e godinës së re të Kolegjit Europian në Godinën Iliria që aktualisht nuk përdoret në shërbim të studentëve por në shërbim të Kolegjit Europian që në fakt është një universitet privat dhe jo publik.
Pra studentët nuk kanë asnjë përfitim publik nga kjo histori, përkundrazi studentët humbasin nga shfrytëzimi i pronës publike për interes të privatit që në këtë rast është Bashkimi Europian me kolegjin privat që pritet të ketë godinën e re në Godinën Iliria e cila shumë shpejt do të shembet për t’u shfrytëzuar si pronë private nga Kolegji Europian.
