Tarifat e reja amerikane për mallrat kineze hynë në fuqi të martën, me Kinën që njoftoi menjëherë vendosjen e tarifave për importet amerikane si kundërpërgjigje.
Kina tha se do të vendoste tarifa prej 15 përqind për qymyrin amerikan dhe gazin natyror të lëngshëm, si dhe tarifa prej 10 për qind për naftën e papërpunuar, makineritë bujqësore dhe disa lloje makinash.
Masat amerikane përfshijnë një tarifë prej 10 përqind për të gjitha mallrat kineze, të cilën Presidenti Donald Trump e shpalli në një përpjekje për të ushtruar trynsi mbi Kinën që të ndërmarrë veprime për të parandaluar kontrabandën e fentanilit në Shtetet e Bashkuara.
Qeveria amerikane e ka identifikuar Kinën si një burim kryesor të kimikateve të përdorura nga kartelet meksikane të drogës për të prodhuar fentanil.
Kina ka thënë se ka ndërmarrë hapa për të goditur industrinë dhe tregtinë e paligjshme të drogës.
“Shpresoj që Kina do të ndalojë së dërguari fentanil dhe nëse jo, tarifat do të rriten ndjeshëm.” – tha Presidenti Trump.
Zëdhënësja e Shtëpisë së Bardhë Karoline Leavitt, tha të hënën se Presidenti Trump do të bisedonte me presidentin kinez Xi Jinping në ditët në vijim.
Presidenti Trump shtyu për një muaj hyrjen në fuqi të tarifave prej 25 përqind për eksportet nga Meksika dhe Kanadaja, pasi bisedoi me presidenten meksikane Claudia Sheinbaum dhe kryeministrin kanadez Justin Trudeau.
Zonja Sheinbaum tha se do të dërgojë 10.000 trupa të Gardës Kombëtare në përpjekje për të frenuar rrjedhën e fentanilit në SHBA.
“Meksika do të përforcojë kufirin verior … për të ndaluar trafikun e drogës nga Meksika në Shtetet e Bashkuara, në veçanti fentanilin.” – shkroi Presidentja Sheinbaum në platformën X pasi bisedoi me zotin Trump.
“Shtetet e Bashkuara angazhohen të punojnë për të ndaluar trafikimin e armëve me precizion të lartë në Meksikë.”
Udhëheqësja meksikane shtoi se të dyja vendet do të vazhdojnë bisedimet për sigurinë dhe tregtinë dhe se “tarifat janë pezulluar për një muaj duke filluar nga sot”.
Kryeministri Trudeau tha se Kanadaja do të vendosë teknologji dhe personel të ri përgjatë kufirit të saj me Shtetet e Bashkuara për të ndaluar rrjedhën e fentanilit.
“Sapo zhvillova një telefonatë pozitive me Presidentin Trump.” – tha zoti Trudeau në X.
“Tarifat e propozuara do të pezullohen për të paktën 30 ditë ndërsa ne punojmë së bashku.”
Të dy, Presidentja Sheinbaum dhe Kryeministri Trudeau, që përfaqësojnë dy nga tre partnerët më të mëdhenj tregtarë të SHBA-së së bashku me Kinën, protestuan ndaj planeve të Presidentit Trump për tarifat dhe u zotuan për veprime hakmarrëse. /VOA
