Ditën e dielë u zhvilluan zgjedhjet për kryetar të degës së Krujës në Partinë Demokratike. Kandidatë ishin Aulon Ylli Kalaja dhe Myftar Hysen Ismailaja. Proçesi zgjedhor ishte për degën e re të bashkuar që përfshin edhe Fushë Krujën, sipas rregullave statutore të partisë.
Rezultati përfundimtar tregon një diferencë të theksuar në favor të Kalasë. Në proçes morën pjesë 717 anëtarë të PD-së nga disa njësi të zonës, përfshirë Krujën, Fushë Krujën, Thumanën, Burizanën, Cudhin, Niklën dhe Bubqin.
Sipas të dhënave zyrtare, Kalaja siguroi 622 vota ndërsa Ismailaja morri 76 vota, për pasojë Aulon Kalaja morri drejtimin e Partisë Demokratike në Krujë.
Pas rezultatit të zgjedhjeve Aulon Kalaja ka reaguar publikisht duke thënë se i shtrin dorën të gjithëve, duke paralajmëruar hapje dhe rifreskim të strukturave të Partisë Demokratike në Krujë.
“Sot dhe neser i shtrij dorën çdokujt që kërkon të japë nga vetja dhe ju them se asnjë kontribut i juaji nuk do të humbasë, por do të llogaritet një më një. Ashtu siç është e nevojshme që strukturat tona duhet të rifreskohen, të hapemi, të ftojmë familjet e djathta, të thërrasim themeluesit, të vijnë të rinjtë, por të mbajmë të vjetrit, të përndjekurit që janë fibra e të djathtës, sepse forca jonë politike ka një nga vlerat e patjetërsueshme, ruajtjen e traditës. Prandaj me mua nuk nis “viti 0”, por unë jam kryetari i radhës, që do kem nderin të drejtoj një nga zonat më të mrekullueshme të Shqipërisë. T’iu shtrimë dorën dhe të painteresuarve, indifererentëve dhe të zhgënjyerve, duke iu bërë thirrje që te na bashkohen në këtë përpjekje për ndryshim.
Strukturat tone do pasurohen edhe më shumë. Seksionet, grup-seksionet, kryesia, sekretariatet, departamentet, forumi i gruas, forumi rinor dhe çdo grupim tjetër që funksionon në familjen tonë politike.
Një gjë dua t’ju premtoj, se unë nuk do t’ju tradhëtoj kurrë.
Ne besojmë tek Zoti, familja, kombi, prona, ndaj le të ftojmë të gjithë ata që kanë diçka për të dhënë në këtë mision, të na bashkohen.” – shkroi Kalaja në reagimin e tij publik pas proçesit të zgjedhjeve.
