Një aksident tragjik ka ndodhur rreth orës 14:20 në lagjen nr. 15 të Durrësit, ku një automjet tip “Benz” ka përplasur tre fëmijë të cilët ishin duke luajtur në trotuar. Për pasojë, dy fëmijë, të moshës 10 dhe 13 vjeç, kanë humbur jetën në vendngjarje, ndërsa një 8-vjeçar është transportuar në gjendje të rëndë drejt Spitalit të Traumës në Tiranë. Pas aksidentit, drejtuesi i mjetit ka braktisur automjetin dhe është larguar, por është arrestuar pak minuta më vonë nga policia. Autori i ngjarjes është identifikuar si Nikoll Radaçi, 57 vjeç, që dyshohet të ketë qenë në gjendje të dehur në momentin e aksidentit.
Sipas dinamikës së ngjarjes së zbardhur nga policia, Nikoll Radaçi ka qenë duke lëvizur me shpejtësi të lartë dhe në gjendje të dehur, duke humbur kontrollin e mjetit dhe duke përfunduar në trotuar ku po luanin fëmijët. Banorët e zonës e përshkruajnë Radaçin si një person problematik që shpesh kryente manovra të rrezikshme me automjet dhe konsumonte alkol. Përplasja ka qenë fatale për dy të miturit, ndërsa fëmija i tretë vazhdon të jetë në gjendje të rëndë për jetën.
Në vendngjarje kanë mbërritur menjëherë forcat e policisë dhe grupi hetimor për të sqaruar shkaqet e aksidentit. Ndërkohë, Nikoll Radaçi ndodhet i arrestuar në Komisariatin e Durrësit, ndaj tij pritet të rëndojnë akuza të rënda për shkaktimin e aksidentit fatal.
