Një mesazh fyes që nisi gjithçka, në një grup WhatsApp-i ku përfshihej edhe ambasadori i Shqipërisë në Maqedoninë e Veriut, Denion Meidani, ministri i Jashtëm Ferit Hoxha i quajti “idiotë” shqiptarët e Maqedonisë së Veriut. Biseda e plotë tregon se ishte pikërisht ambasadori Meidani ai që dërgoi një lajm të gazetës “Nova Makedonija” në grup, duke shkaktuar reagimin e ashpër të ministrit. Pas publikimit të këtyre mesazheve, u ngrit menjëherë një stuhi reagimesh, me kërkesa për falje dhe shkarkim të ministrit Ferit Hoxha nga opozita.
Burime konfirmuan se largimi i tij ishte i lidhur me “ankesat dhe pakënaqësitë” e autoriteteve në Shkup, të cilat kishin nisur pikërisht pas skandalit të WhatsApp-it. Ambasadori u akuzua se me qëndrimet e tij kishte hyrë në debatet e brendshme politike maqedonase, duke u bërë një “spiun i partive politike”, një kritikë që kishte filluar që në ditët e para të skandalit. Pra, shkarkimi i tij erdhi si pasojë e drejtpërdrejtë e pozitës së ekspozuar në të cilën e kishte vënë ky incident, duke e bërë atë “kokën e parë të prerë” për të “qetësuar” situatën.
Ministri Ferit Hoxha, nga ana tjetër, ka mbijetuar pa asnjë pasojë, duke hedhur poshtë akuzat dhe duke i cilësuar mesazhet si të fabrikuara për konsum politik. Ai është mbrojtur me argumentin se “politika e jashtme nuk komunikohet në WhatsApp”, duke hedhur mënjanë përgjegjësinë për fjalët fyese që ai vetë shkroi në grupin e WhatsApp-it. Qeveria Rama ka mbajtur një qëndrim heshtjeje, duke mos marrë asnjë masë ndaj ministrit të Jashtëm.
Kjo situatë zbulon një kontrast të qartë në mënyrën se si administrata shqiptare trajton llogaridhënien, ambasadori shkarkohet për përfshirjen në të njëjtën bisedë ku ministri fyen hapur shqiptarët e Maqedonisë së Veriut. Shkarkimi i Meidanit duket më shumë si një akt për të shuar “konfliktin” diplomatik, ndërsa autori kryesor i skandalit vazhdon të mbajë postin pa u ndëshkuar. Ky veprim diskriminues dërgon mesazhin e gabuar se roli i një diplomati të karrierës është më i përgjegjshëm sesa ai i një ministri të emëruar politikisht, duke dëmtuar rëndë besueshmërinë e qeverisë shqiptare.
