Një incident i rëndë diplomatik ka ndodhur ditën e sotme pas zbulimit të një mesazhi të ministrit për Evropën dhe Punët e Jashtme, Ferit Hoxha, ku ai i cilëson shqiptarët e Maqedonisë së Veriut si “idiotë” në një bisedë grupi. Pas reagimeve të shumta, Ministria e Jashtme e ka cilësuar fillimisht si të sajuar mesazhin, por opozita përmes deputetit Belind Këlliçi ka publikuar mesazhin që vërtetojnë ekzistencën e tij. Në mesazhin e fshirë më pas, Hoxha shkruante: “Po ata idiotët shqiptarë atje çfarë thonë?“.
Reagimi më i fuqishëm ka ardhur nga vetë shqiptarët e Maqedonisë së Veriut, ku ministri i Ekonomisë Besar Durmishi e ka cilësuar “zhgënjyes dhe të papranueshëm” fjalorin e përdorur nga ministri Hoxha. Durmishi thekson se fjalori i tillë shkel çdo kod etik dhe profesional dhe kërkon reagim dhe sqarim urgjent nga Tirana zyrtare. Në reagimin e tij të plotë, ai i kërkon ministrit Hoxha të kërkojë falje shqiptarëve të Maqedonisë së Veriut për ofendimet e bëra. I jepet edhe një kujtesë se ka obligim kushtetues të kujdeset për bashkëkombësit jashtë kufijve, duke theksuar se ata “nuk janë fqinj nga projekti, por pjesë e pandashme e trungut kombëtar“.
Përveç reagimit politik, incidenti ka ngritur shqetësime të mëdha për etikën diplomatike dhe qëndrimin ndaj çështjes kombëtare, ku opozita i ka kërkuar ministrit Hoxha të japë dorëheqjen. Kritika të forta vijnë edhe për mënyrën si ministria e udhëhequr prej tij fillimisht mohoi publikisht mesazhin. Ky veprim është cilësuar si një përpjekje për të fshehur një skandalin e vërtetë.
