Pas arrestimit të Erion Veliajt si Kryetar i Bashkisë Tiranë në detyrë gjatë kohës kur ai qe në zyrën e tij, personazhe publikë, këngëtarë dhe prezantues emisionesh televizive dolën në mbrojtje të tij duke përkrahur Veliajn që akuzohet publikisht për korrupsion, pastrim parash, mos-deklarim të të ardhurave dhe vjedhje të fondeve publike.
Sipas dokumentave të bëra publike në Open Spending Data shumë prej tyre figurojnë përfitues të fondeve publike të dhëna nga Kryetari i Bashkisë Tiranë Erion Veliaj. Njëri prej tyre është edhe moderatori dhe prezantuesi Ardit Gjebrea ku ka postuar në llogarinë e tij në Instagram një shkrim për Veliajn.
“Askush nuk mund të thotë që Tirana është njësoj si më parë. Dhe për fat të keq si mundet që nuk e bërtasin punën tënde e sa shpejt harruan (me qëllim) që Tiranës ju fute me themel për ta ndryshuar për të mirën e përditshmërisë tonë? Një ditë do të të kërkojnë, dhe e di: I afti gjithmonë e gjen mënyrën të jetë i denjë për veten dhe familjen. Jam i lumtur dhe krenar që kam një mik si ty! #jamerion #kambesimtekti” – shkruan Gjebrea në shkrimin e tij.
Sipas të dhënave nga Drejtoria e Përgjithshme e Thesarit, të pasqyruara në Open Spending Data, rezulton se Ardit Gjerbrea është përfitues i fondeve publike me plot 7 herë në vite të ndryshme për festivalin ‘Kënga Magjike’ me vlerën e 37.970.878 milionë lekë të reja.
Në datën 19.12.2022 Bashkia Tiranë i ka dhënë 8,000,000 lekë Shoqatës Jon Music për festivalin Kënga Magjike 2022.
Një tjetër pagesë që ka marrë nga Bashkia e Tiranës është në 03.12.2021, me vlerë 705,880 lekë për Jon Music sërish për Festivalin Kënga Magjike.
Në datë 11.10.2021 Bashkia Tiranë i ka dhënë Jon Music 6,289,998 lekë për festivalin Kënga Magjike 2021.
Në datë 03.02.2020 Bashkia Tiranë i ka dhënë Jon Music 2,700,000 lekë.
Një tjetër transaksion është bërë nga Bashkia Tiranë për Jon Music në datën 31.01.2020 me vlerë 4,300,000 lekë.
Po ashtu në datën 29.01.2019 Jon Music ka marrë 7,975,000 lekë nga Bashkia e Tiranës.
Në datën 31.12.2024 Bashkia Tiranë gjithashtu i ka dhënë Jon Music 8,000,000 lekë.
