Deputeti i Partisë Demokratike, Belind Këlliçi ka publikuar sot dokumente zyrtare të Ministrisë së Brendshme Gjermane, të cilat dëshmojnë se aksioneri kryesor i Jet Bank, banka e parë online në Shqipëri, lidhet drejtpërdrejt me një skemë ndërkombëtare mashtrimi me vlerë rreth 200 milionë euro. Sipas dokumenteve, kompania Constador LTD me seli në Qipro, e cila zotëron 71% të Jet Bank, ka si drejtor dhe sekretar shtetasin Oliver Hemmer. Ky i fundit rezulton të ketë qenë Drejtor Menaxhues i GRF Europe OU, kompani që operonte për llogari të 4XFX, një skemë mashtruese e drejtuar nga izraeliti Gal Barak, i dënuar me 4 vite burg në Austri për mashtrim me call center.
Dokumentat gjermane tregojnë se Oliver Hemmer menaxhonte aktivitetin e paligjshëm të 4XFX nga adresa në Berlin dhe Estoni, ndërsa kompania e tij në Qipro, Constador LTD, u regjistrua më 30 korrik 2025 dhe mban statusin aktiv. Kjo strukturë kompanish krijon një zinxhir të qartë lidhjesh mes një individi të përfshirë në mashtrime ndërshtetërore dhe aksionerit të një banke të licencuar nga Banka e Shqipërisë. Për më tepër, vetë 4XFX është raportuar nga autoritetet rregullatore në Angli, Spanjë dhe Estoni si firmë e paautorizuar dhe që ofron shërbime pa licencë.
Deputeti Këlliçi e cilëson këtë rast jo më thjesht si shkelje ligjore, por si një problem sistemik që vë në dyshim procesin e verifikimit të Bankës së Shqipërisë. Ai pyet nëse Shqipëria po kthehet nga një bazë operative e call center-ave mashtruese në një nyje për pastrimin e parave të përfituara nga krimi. Mungesa e reagimit deri më tani nga institucionet shqiptare e bën këtë çështje një test të rëndë për besueshmërinë e sistemit bankar vendas.
Prania e Oliver Hemmer në dy role drejtuese brenda Constador LTD, si dhe regjistrimi i kompanisë në Qipro, një juridiksion i njohur për transparencë të kufizuar, ngre dyshime të arsyeshme për burimin e kapitalit të Jet Bank. Banka e Shqipërisë, e cila ka licencuar këtë institucion financiar, nuk ka dalë ende me një qëndrim publik mbi mënyrën se si janë verifikuar këta aksionerë. Dokumentat gjermane janë të datës 2019, pra autoritetet shqiptare kanë pasur kohë të mjaftueshme për t’i hetuar këto lidhje para se të jepnin licencën.
Këlliçi i bën thirrje Prokurorisë dhe Bankës së Shqipërisë që të pezullojnë menjëherë licencën e Jet Bank dhe të hapin një hetim të plotë për të gjithë zinxhirin e aksionerëve. Nëse kjo vijë alarmi kalon pa reagim, rrezikohet jo vetëm reputacioni i Shqipërisë si destinacion për investime, por edhe stabiliteti i vetë sistemit bankar. Institucionet shqiptare ndodhen përballë një përgjegjësie të qartë: të tregojnë nëse janë të gatshme të mbrojnë integritetin financiar të vendit apo të tolerojnë hyrjen e kapitalit me origjinë të dyshimtë.
Postimi i Këlliçit:
“Skandali i rradhës me Jet Bank dhe Bankën e Shqipërisë!
Sot po publikoj dokumente zyrtare të Ministrisë së Brendshme Gjermane, që hedhin dritë mbi kërcënimin serioz të sistemit tonë bankar nga licensimi i JET BANK, ku një zinxhir marrëdhëniesh mes disa individësh nuk mund të trajtohen më si rastësi administrative.
Sipas tyre, shtetasi Oliver Hemmer është Drejtori Menaxhues i kompanisë GRF Europe OU, e cila operonte për llogari të kompanisë 4XFX, në pronësi të shtetasit Izraelit, Gal Barak.
Ky i fundit i dënuar me 4 vite burgim në Austri, pasi ka ngritur një skemë mashtrimi me Call Centera me një dëm të vlerësuar rreth 200 milionë euro në disa shtete europiane si Angli, Austri, Gjermani, Spanjë, etj.
Në një tjetër dokument shihet qartë se Oliver Hemmer është edhe drejtori i kompanisë së regjistruar në Qipro, Constador LTD. Pikërisht kjo kompani është pronare me 71% e JET BANK, të parës bankë online në Shqipëri.
Në këtë pikë, çështja nuk është më thjeshtë ligjore, por sistemike. Banka e Shqipërisë ka licensuar këta individë për të hapur bankën e parë online në vend, duke ngritur pikëpyetje serioze mbi standardet e verifikimit dhe integritetin e procesit.
Por, më shumë se kaq, pyetja që shtrohet sot nuk është nëse ka pasur shkelje ligjore, por përtej kësaj, a po lejojmë që Shqipëria të evoluojë nga një bazë operative e call center-ave që zhvasin qytetarët evropianë, në një nyje të pastrimit të këtyre parave?!
Nëse kjo vijë alarmi kalon pa reagim, ky skandal do të përbënte një rrezik të drejtpërdrejtë për besueshmërinë dhe qëndrueshmërinë e vetë sistemit bankar shqiptar.”
