Një revoltë e heshtur por e dokumentuar ka përfshirë institucionin e Avokatit të Popullit, i cili sipas punonjësve po përjeton degradimin më të rëndë në historinë e tij. Një grup punonjësish i është drejtuar zyrtarisht Kryetarit të Kuvendit, Niko Peleshi, dhe kryetarëve të komisioneve kyçe: Jorida Tabaku (Partia Demokratike), Fatmir Xhafaj (Partia Socialiste) dhe Ulsi Manja (Partia Socialiste), duke kërkuar ndërhyrje të menjëhershme. Akuzat janë të rënda: Shabani akuzohet për pezullime arbitrare pa asnjë shpjegim ligjor, dorëheqje të imponuara dhe zëvendësime të paligjshme të stafit jashtë çdo konkursi. Këto veprime, sipas denoncimit, kanë shkatërruar çdo parim meritokracie, duke e kthyer institucionin në një terren personal të drejtuesit.
Pezullimi i numrit dy të institucionit cilësohet nga stafi si një lëvizje destabilizuese dhe e pajustifikueshme, që trondit funksionimin e përditshëm. Endri Shabani ka krijuar brenda zyrave një klimë të vërtetë frike dhe presioni psikologjik ndaj të punësuarve është i vazhdueshëm. Sipas denoncimit, ai urdhëron veprime që bien hapur në kundërshtim me ligjin për shërbimin civil, ndërsa vetë mban qëndrime servile ndaj pushtetit politik. Burimet e cilësojnë Shabanin si një drejtues që ka braktisur çdo parim të pavarësisë institucionale, duke e shndërruar Avokatin e Popullit në një degë të ekzekutivit për të shtypur zërat kritikë brenda.
Pasojat janë shkatërruese për misionin qytetar të institucionit, pasi Avokati i Popullit ka pushuar së prodhuari rekomandime serioze për shkeljet e të drejtave të njeriut. Dosjet e qytetarëve janë lënë të mbledhura pirg, duke treguar se shqetësimet e vërteta të njerëzve të thjeshtë nuk janë më prioritet. Në vend të kësaj, i gjithë fokusi i Shabanit është zhvendosur te “show” në rrjetet sociale për të krijuar një imazh publik sa më të favorshëm për veten, duke neglizhuar plotësisht punën në terren. Sektorë të tërë jetikë, si ai për të drejtat e fëmijëve, janë çorganizuar plotësisht përmes lëvizjeve të stafit pa asnjë kriter profesional, duke lënë në harresë më të dobëtit.
Situata paraqet rreziqe serioze edhe për sigurinë e të dhënave të qytetarëve ankimues, të cilat po mblidhen në forma jo-standarde, duke u ekspozuar ndaj abuzimeve. Profesionalë të tjerë të pavarur e kanë paralajmëruar se veprimet e Shabanit rrezikojnë të shembin çdo besim tek institucioni i Avokatit të Popullit. Në vend që të mbahet përgjegjës, Shabani po konsideron të hakmerret duke nisur procedura disiplinore kundër vetë denoncuesve, një veprim që do të konfirmonte natyrën autoritare të drejtimit të tij. Përballë këtij degradimi, është urgjente që Kuvendi të reagojë dhe të mos lejojë që një institucion kyç për mbrojtjen e njeriut të shndërrohet në një parcelë personale të pakontrolluar të Endri Shabanit.
