Teksa viti i ri akademik ka hyrë tashmë dhe studentët janë akomoduar në konviktet e Qytetit Studenti, situata po bëhet përditë e më kaotike dhe më e padurueshme për studentët e akomoduar që përveç kushteve skandaloze në konvikte do duhet të përballen me terrorin e “të fortëve” me makina në Qytetin Studenti. Pak ditë më parë aktivisti i kauzave studentore Aurel Kujtimi denoncoi një skandal ku është përfshirë edhe policia e shtetit në konflikte me “të fortët” që qarkullojnë përnatë me makinat e tyre në Qytet Studenti.
Studentët kanë filluar të kenë shqetësime dhe pranë platformës “Studentët Denoncojnë” po mbërrijnë shqetësime dhe denoncimet nga ana e studentëve të akomoduar pranë konvikteve në Qytetin Studenti. Ndërkohë që neglizhenca dhe papërgjegjshmëria nga ana e institucioneve ka qëllim që të dekurajojë studentët e akomoduar pranë konvikteve në Qytetin Studenti në mënyrë që të mos e shohin akomodimin si mënyrë për të pasur jetën universitare për shkak të mungesës së sigurisë.
Denoncimi i plotë:
“Përshëndetje si jeni
Situata në QS është bërë shumë e padurueshme. Edhe pse ka patrulla policie prapë makinat qarkullojnë njësoj si më përpara. Mendoj se duhet të merren akoma më shumë masa për të na dhënë siguri në ambientet që ne jetojmë. Është bërë një ambient shumë i shpifur dhe sikur të kalosh një herë të vetme, mos të flasim ne studentët që jetojmë këtu. Anonim ju lutem!”
