Një incident rilindasish është regjistruar mbrëmjen e kaluar në kampin socialist në Kavajë, ku një përplasje verbale ka degjeneruar në dhunë fizike mes drejtuesve lokalë të Partisë Socialiste.
Ngjarja ka ndodhur rreth orës 23:00 në një zyrë elektorale në qytet. Sipas burimeve, në konflikt janë përfshirë koordinatori i zonës dhe njëkohësisht kandidati i PS për Kavajën, Eldian Çepeli, dhe bashkëpunëtori i tij, Vis Gjeçi, të cilët dyshohet se kanë ofenduar dhe goditur me grusht kryetarin aktual të degës lokale të PS, Shpend Barameta.
Sipas dëshmitarëve, sherri ka nisur pas kundërshtimeve të Barametës lidhur me mënyrën se si është imponuar kandidimi i Çepelit në zonë, pa u konsultuar me bazën socialiste.
Pas përplasjes fizike, Barameta ka njoftuar Policinë e Kavajës, por në momentin e mbërritjes së uniformave blu, ai ka hezituar të bëjë denoncim zyrtar, me qëllim që çështja të mos përfundojë në media dhe të zgjidhet brenda strukturave.
Duket që arrestimet nga SPAK, hetimet që po zhvillohen për aferat korruptive dhe përfshirja e Partisë Socialiste në krime zgjedhore edhe në këto zgjedhje kanë filluar të krijojnë acarime të brendshme edhe vetë brenda strukturave lokale më pak se një muaj larg zgjedhjeve të 11 Majit.
