Ditën e djeshme është publikuar një shkrim i ish-ministres së arsimit dhe kryeparlamentares Lindita Nikolla me titullin “Shqip të flisni përherë/ Fjesht e të papërzjerë”. Përveçse në shkrim duken gabime të mëdha drejtshkrimore një pjesë e madhe e shkrimit është marrë e kopjuar nga shkrimi i akademikut Gjovalin Shkurtaj në vitin 2022 me titullin “Mbrojtja dhe vlerësimi i shqipes si tipar themelor i kombit tonë”.
“Gjuha shqipe është tipar themelor i kombit shqiptar, prandaj atë duhet ta ruajmë dhe ta mbrojmë , ta shkruajmë e ta flasim sa më thjeshtë, me saktësi e sa më bukur. Natyrisht edhe ta pasurojmë e ta vlerësojmë ashtu si të gjitha kombet e qytetëruara.
Të flasësh e të shkruash në gjuhën amtare, në gjuhën e nënës (apo sikundër thuhet zakonisht “në gjuhën e të parëve”), për shumicën e popujve të botës ka qenë një nga gjërat më të natyrshme dhe të patjetërsueshme, si procesi i frymëmarrjes dhe të ushqyerit apo i rritjes dhe i jetesës së njeriut. Por, për fat të keq, nuk ka qenë kështu për shqiptarët, për njërin nga popujt më të hershëm të Evropës, autokton në trojet e veta në brigjet e Adriatikut e të Jonit, në këtë vend të bukur, me pasuri e bukuri të mahnitshme natyrore, i lakmuar dhe i pushtuar me shekuj prej të huajve, të cilët, ndër të tjera, për ta mbajtur nën sundim, popullin shqiptar nuk e lejonin as të hapte shkolla shqipe. Kjo, sidomos, në kohën e pushtimit pesëshëkullor nga Perandoria Osmane, prandaj, historikisht, përpjekjet dhe lufta e popullit tonë për çlirim kombëtar, kanë pasur si kërkesë të parë e themelore ruajtjen e gjuhës shqipe, të drejtën për të pasur shkolla në gjuhën amtare, të drejtën për t’iu lutur Zotit në gjuhën shqipe.” – është pjesa e shkrimit të akademikut Gjovalin Shkurtaj e kopjuar në shkrimin e bërë nga Lindita Nikolla.
Në vitin 2018 në kohën kur ishte ministre e arsimit Lindita Nikolla është akuzuar për emërimin e njerëzve pranë saj me materiale të publikuara plagjiaturë dhe gjithashtu dokumetat e publikuara për mesataren e Lindita Nikollës në shkollë të lartë kanë vënë në pikëpyetje aftësinë e Lindita Nikollës për të qenë me poste të rëndësishme në vendimmarrje në qeveri apo tani si kryeparlamentare.
