Një grup infermierësh që kanë përfunduar studimet e nivelit master shkencor në muajin Gusht në Fakultetin e Shkencave Mjekësore Teknike denoncojnë një situatë tepër shqetësuese ku prej muajsh mbahen peng duke mos i’u dhënë kartonat e diplomave. Ata deklarojnë se interesohen pranë fakultetit çdo dy javë dhe përgjigja që marrin është e njëjtë duke ju thënë se nxerrja e kartonëve është në proçes.
Pajisja me diplomën e masterit është një dokument i rëndësishëm për zhvillimin profesional dhe ndikon drejtpërdrejt edhe në kategorizimin dhe rritjen e pagës së tyre si personel mjekësor. Është e papranueshme që profesionistë të shëndetësisë, të cilët mbajnë çdo ditë përgjegjësi të madhe për jetën e pacientëve, të përballen me vonesa administrative për dokumente kaq të rëndësishme për karrierën e tyre.
Infermierët kërkojnë transparencë dhe një përgjigje të qartë nga institucionet përgjegjëse se përse po zvarritet ky proces dhe kur do të pajisen me diplomat që u takojnë me të drejtë. Kjo vonesë po krijon vështirësi reale për infermierët që tashmë janë pjesë e sistemit shëndetësor dhe punojnë çdo ditë në shërbim të pacientëve.
Denoncimi i plotë
Përshëndetje
Jam infermiere në QSUT. Kemi mbaruar në muajin Gusht unë dhe 104 studentë të tjerë masterin shkencor në FSHMT dhe kemi marrë vetëm vërtetimin e diplomës por ende jo kartonat e diplomave. Interesohemi tek fakulteti çdo dy javë dhe na kthejnë me përgjigjen janë në proçes e sipër. Duam që prej jush të shpërndahet si lajm sepse ne si personel tashmë mjekësor na ndihmon sado pak me rritje të pagës.
Faleminderit!
