Qeveria ka mbajtur këtë të mërkurë në Tiranë, Konferencën Ministeriale të Zonës Europiane të Arsimit të Lartë e cila është zhvilluar me pjesëmarrjen e 70 vendeve të botës. Konferenca u mbajt në saj të programit EHEA 2024 të Progresit të Bolonjës. Qeveria ka shfrytëzuar këtë ngjarje në shërbim të mashtrimeve të saj dhe të propagandës ku realiteti është i krejt i kundërt nga ajo që shet Ministrja e Arsimit Ogerta Manastirliu apo deklaratat propagandiste të Kryeministrit Edi Rama me pseudo Naton e arsimit.
Për platformën Studentët.al ka reaguar eksperti dhe profesori Taulant Muka. Në prononcim Taulant Muka është shprehur se vetëm një grant shkencor nga Bashkimi Europian mund të arrijë 10 milion euro kur qeveria shpenzon 5.5 milionë euro në total për studentët e Fakultetit të Mjekësisë dhe të ardhurat shkojnë më shumë për tendera sesa për kërkimin shkencor.
“Vetëm një grant shkencor nga BE mund të arrijë deri në 10 milion Euro, ndërsa shteti ynë ofron më pak se 5.5 milion Euro për fakultetin e mjekësisë për të përgatitur mjekët e ardhshëm. Shtatë universitete publike shpenzojnë 2.4 milion Euro për mirëmbajtjen e ndërtesave dhe vetëm 74 mijë Euro së bashku për kërkime shkencore. Ndërkohë, kostoja për një kilometër rrugë në Shqipëri është 12.2 milion Euro. A mundet një ministre arsimi ta vlerësojë këtë gjendje si arritje dhe reformë? Prandaj vendi ynë ka nevojë jo për një ministre arsimi plagjiatore, por për një ministër arsimi me një karrierë të ndërtuar mbi mund dhe origjinalitet.
Ndërkohë që motorri i ekonomisë në botë është shkenca dhe inovacioni, Ministria e Arsimit me (ç)reformat e ndërrmara pengon zhvillimin e elitave shqiptare dhe ngritjen e kombit shqiptar në nivele ndërkombëtare në shkencë.” – është shprehur eksperti dhe profesori Taulant Muka./ studentët.al
