Një hetim disamujor i prokurorisë së Elbasanit nën drejtimin e prokurorit Xhiljan Seferi grumbulloi prova të mjaftueshme për të çuar në ndjekje penale shtatë pedagogë të Universitetit Aleksandër Xhuvani të Elbasanit, fakulteti i Shkencave të Edukimit.
Pedagogët do të përgjigjen për veprën penale “Korrupsion Pasiv” ndërsa një person i tetë i cili dyshohet se kryente rolin e sekserit në këtë aferë korruptive është arrestuar nga policia për “Korrupsion Aktiv”.
Pedagogët e dyshuar tashmë për korrupsion pasiv janë Ornela Bilali, Zyhra Gripshi, Adrian Shingjergji, Beatriçe Gani, Edlira Gugu, Florinda Tarusha dhe Monika Hodaj. Të shtatë pedagogët janë shoqëruar mëngjesin e kësaj të premte në policinë e Elbasanit menjëherë pasi kanë mbërritur në Fakultetin e Shkencave të Edukimit.
Ndaj tyre gjykata ka vendosur më herët masën e sigurisë “detyrim paraqitje” ndërkohë që për orë të tëra ekspertë të prokurorisë dhe policisë së Elbasanit kanë qëndruar në ambientet e këtij fakulteti për të sekuestruar prova të tjera të cilat do ti shërbejnë këtij hetimi, duhet thënë, më i madhi i korrupsionit i hetuar ndonjëherë në Universitetin e Elbasanit.
