Prej 3 muajsh tanimë llogaria e portalit më të madh të studentëve në Instagram “Studentët Denoncojnë” mbetet e mbyllur me urdhër të qeverisë shqiptare për shkak edhe të faktit që është ndër të parët si portal që ka qenë pranë protestës që në ditën e parë të saj. Administratorët dhe stafi i portalit “Studentët Denoncojnë” gjatë këtyre 3 muajve është duke bërë përpjekje të vazhdueshme duke qenë në kontakt të vazhdueshëm për të rikthyer llogarinë në Instagram.
Në një formë të papreçedentë komunikimi Instagram ka dërguar një email pranë nesh në datën 9 Qershor, duke qenë të parët në vend që pohohet fakti që qeveria shqiptare ka komunikuar me kompaninë dhe platformën përkatëse për të mbyllur dhe ç’aktivizuar llogarinë e portalit “Studentët Denoncojnë”, madje Instagram na thotë që duhet të kontaktojmë me autoritetet përkatëse pasi ato mund të shqyrtojnë rikthimin e llogarisë.
“Ne kemi fshirë përmbajtjen e mëposhtme që keni publikuar në Instagram, bazuar në një raportim nga, i cili konsideron se përmbajtja shkel ligjin vendor:
@studentet__denoncojne
Nëse keni ndonjë shqetësim ose pyetje, mund të kontaktoni autoritetin për të shqyrtuar rastin tuaj.
Mund të dëshironi të rishikoni përmbajtjen që keni publikuar në Instagram, për t’u siguruar që nuk keni publikuar përmbajtje të tjera që shkelin ligjin.
Ekipi i Instagram-it” – thuhet në emailin e dërguar nga Instagram në 9 Qershor.
Në postimin e tij në rrjetin X, kryeministri Edi Rama ka deklaruar se qeveria shqiptare nuk qëndron pas mbylljes dhe ç’aktivizimit të llogarive në Instagram dhe “nuk zotëron as kapacitetin teknik për të kryer një operacion të tillë”. Atëhere lind pyetja, përse Instagram na ka nisur një email të tillë? Ku vërtetohet që Instagram për llogari të qeverisë shqiptare ka mbyllur llogarinë në Instagram të portalit më të madh të studentëve “Studentët Denoncojnë”.
“Pra, dua ta bëj absolutisht të qartë: ne nuk kemi të bëjmë në asnjë mënyrë me çaktivizimin apo kufizimin e ndonjë llogarie në rrjetet sociale, dhe as nuk zotërojmë kapacitetin teknik për të kryer një operacion të tillë.” – ka deklaruar kryeministri Rama në postimin e tij në rrjetin X, në 3 Shtator.
“Studentët Denoncojnë” kërkojnë që Instagram të rikthejë llogarinë dhe të mos i bindet urdhërave politike të qeverisë shqiptare me në krye kryeministrin Edi Rama duke respektuar lirinë e medias, lirinë e fjalës dhe të të shprehurit, si pasojë edhe duke respektuar konventat dhe ligjet ndërkombëtare për to.
Ne do të vazhdojmë misionin për të qenë të pavarur dhe kauzën për të qenë pranë studentëve dhe të rinjve kundër padrejtësive që u bëhen atyre dhe kundër aferave korruptive që ndikojnë në jetën e studentëve dhe të të rinjve në kurriz të tyre dhe fondeve publike.
