Kryeministri Edi Rama ka paralajmëruar me përjashtim nga Grupi Parlamentar i Partisë Socialiste deputeten Elisa Spiropali, pas qëndrimeve dhe postimeve të saj në rrjetet sociale. Gjatë një mbledhjeje me dyer të mbyllura të PS-së, Rama i ka numëruar asaj dy “shkelje“: mungesën në një votim dhe një postim në Facebook, duke e kërcënuar se një herë e tretë do të përjashtohej përfundimisht.
Kreu i qeverisë i ka thënë Spiropalit se brenda partisë “nuk mund të bëni drama“, duke i vënë ultimatum: “O me ne, o përballë nesh“. Sipas burimeve, kur Spiropali ka kërkuar fjalën për t’u mbrojtur, Rama nuk e ka lejuar, duke i thënë se me të ka investuar Partia Socialiste dhe ai vetë. Ky konflikt vjen pasi Spiropali e ka cilësuar publikisht PS-në si një “parti drejtorësh“, ndërsa Rama e ka përmbyllur fjalimin e tij duke i kërkuar asaj të “marrë frymë thellë dhe të reflektojë“.
“Herën e parë nuk erdhe në votim. Herën e dytë bërë çarçafin dhe herën e tretë nuk ka, del jashtë këtij grupi. Tek puna e partisë nuk mund të bëni drama, dhe për këtë po të drejtohem ty Elisa. Nuk dua të krijoni situata në parti. Partia ka dy ngjyra, bardhë e zi, ose bardhë dhe me ne, ose zi dhe përballë nesh. Ti s’mund të replikosh këtu, ti nuk merr fjalë më, me ty është investuar PS dhe unë.” – mësohet ti ketë thënë Rama në mbledhje Spiropalit.
