Robert Kennedy Jr. i njohur për mbështetjen e dhënë pak muaj më parë ndaj kandidatit republikan për zgjedhjet e nesërme në SHBA Donald Trump ka kërkuar në mënyrë zyrtare qeverisë së SHBA të dhënat për efektet anësore të vaksinave. Raportohet se stafi i tranzicionit të kandidatit Donald Trump është në mbështetje të Robert Kennedy Jr. për të kërkuar këto të dhëna nga qeveria federale e SHBA.
Howard Lutnick, CEO i kompanisë së shërbimeve financiare Cantor Fitzgerald, i tha CNN se Kennedy dëshiron të ketë akses në të dhëna kështu që ai të thotë se këto gjëra janë të pasigurta” dhe kjo do të ndalojë shitjet.
“Ai thotë, nëse më jepni të dhënat, gjithçka që dua janë të dhënat dhe unë do të marr të dhënat dhe do të tregoj se nuk janë të sigurta. Dhe më pas, nëse tërheq detyrimin e produktit, kompanitë do t’i heqin këto vaksina menjëherë nga tregu. Pra, kjo është pika e tij.” – tha Lutnick për CNN.
Donald Trump i ka premtuar Kennedy një nga postet më të rëndësishme në administratë për shëndetin e popullsisë së SHBA, nëse do të fitojë në mënyrë që të reformojë agjensitë e shëndetit publik në qeverinë federale.
I pyetur në lidhje me komentet e Kennedy dhe rolin e tij në administratën Trump, Jason Miller, një këshilltar i lartë për fushatën tha se e vetmja gjë ku Trump dhe fushata e tij janë fokusuar është fitorja më 5 nëntor.
“Gjithçka pas kësaj është pas kësaj dhe Presidenti Trump e ka bërë të qartë se Bobby Kennedy do të luajë një rol të rëndësishëm.” – shkroi Miller.
Organizata kundër vaksinave të Kennedy ka një proces gjyqësor në pritje kundër organizatave të lajmeve, përfshirë The Associated Press.
