Dhoma Penale e Gjykatës së Tiranës ka shpallur të mërkurën, më 5 maj 2026, të pafajshëm gazetarin dhe aktivistin Aulon Kalaja në procesin gjyqësor të nisur nga kryetari i Bashkisë së Tiranës, Erion Veliaj. Gjyqi, i cili zgjati për rreth shtatë muaj, u zhvillua gjithsej në 17 seanca dhe i kishte rrënjët në një deklaratë të bërë nga Kalaja në muajin shtator, në një emision. Pas shpalljes së vendimit, Aulon Kalaja shprehu mirënjohjen e tij të thellë për ekipin ligjor, të udhëhequr nga avokati Alban Alimema, dhe për të gjithë mbështetësit që besuan në integritetin e tij. Kalaja e cilësoi padinë e Veliajt si një “padi strategjike“, e ngritur me synimin për ta frikësuar dhe për ta bërë të tërhiqej nga deklaratat e tij publike.
Pikënisja e këtij procesi ishte padia e ngritur nga Erion Veliaj, pasi Kalaja kishte deklaruar se në fillimet e tij politike, kryebashkiaku vishej me fustan dhe u ofronte shërbime seksuale ambasadave të ndryshme në Tiranë. Kalaja publikisht i ishte referuar disa fotografive, duke përmendur emrat e Arbjan Maznikut, Endri Fugës dhe vëllait të Veliajt, Arbër Veliaj të cilët sipas tij ishin veshur si gra dhe kishin marrë pjesë në festa me karakter seksual. Gjatë gjithë procesit, i cili nisi në tetor 2025, Kalaja pati pohuar në mënyrë të përsëritur se nuk do të tërhiqej asnjë hap pas nga deklaratat e tij, duke kërkuar vetë të gjykohej për të vërtetuar të vërtetën. Në përfundim, provat kryesore të paraqitura bënë të mundur që Kalaja të shpallej i pafajshëm, ndërsa vetë Veliaj nuk ishte i pranishëm as në këtë seancë vendimtare, siç nuk ka qenë në çdo seancë që prej muajit Tetor.
Procesi gjyqësor u shoqërua me shtyrje të shumta, ku Veliaj u akuzua vazhdimisht nga Kalaja se po “i bën bisht drejtësisë“. Pavarësisht se Veliaj vazhdoi të përfaqësohej në gjykatë përmes avokatit të tij, Kalaja e përshkroi procesin si një “kalvar shtyrjesh“, duke akuzuar se pala kundërshtare po përpiqej të zvarriste procedurat për ta mbajtur atë nën presion për sa më gjatë.
Lajmi për shpalljen e pafajësisë së Aulon Kalasë përshëndetet si një fitore e lirisë së shprehjes dhe një goditje tjetër për kryebashkiakun në burg, duke tërhequr vëmendjen e madhe të opinioneve publike dhe mediave në Shqipëri. Ky vendim vjen në një kohë kur Erion Veliaj po përballet me një seri proçesesh të tjera gjyqësore dhe padish, duke e konsoliduar këtë rast si një nga më të profilit të lartë në arenën politiko-gjyqësore shqiptare. Për Aulon Kalanë, ky rezultat shënon një çlirim nga një proces që ai e konsideronte abuziv dhe që, sipas tij, kishte për qëllim të shtypte lirinë e tij profesionale dhe të mendimit. Kjo çështje ngre alarmin për “paditë strategjike” dhe për pasojë ngrihen pikëpyetje rreth klimës së lirisë së të shprehurit në vend.
