Gjykata Speciale për krimet e luftës në Kosovë (Dhomat e Specializuara) ka shtyrë shpalljen e aktgjykimit për ish-krerët e UÇK-së për në 20 korrik 2026. Ky vendim ishte parashikuar fillimisht të shpallej më 19 maj brenda afateve procedurale, por trupa gjykuese ka shfrytëzuar limitet e afateve për të marrë deri në 90 ditë kohë, me mundësi zgjatjeje edhe për 60 ditë të tjera. Lajmin për këtë shtyrje e ka konfirmuar për mediat avokati i ish-presidentit Hashim Thaçi, Luka Mishetiq, duke mos dhënë shpjegime të hollësishme për arsyet e vonesës. Kjo ka shkaktuar reagime të ashpra nga Organizata e Veteranëve të Luftës së UÇK-së, të cilët e cilësojnë këtë si një “turp të madh”.
Në reagimin e tyre, veteranët theksojnë se kjo tjetër shtyrje tregon mosinteresim për një proces të drejtë, njëkohësisht duke akuzuar Gjykatën Speciale se po vepron në kundërshtim me ligjin dhe se diçka po fshihet pas kësaj. Sipas OVL-së së UÇK-së, vonesat e përsëritura po cënojnë dinjitetin e ish-krerëve të Ushtrisë Çlirimtare dhe po sjellin padrejtësi për familjet e tyre. Ata kërkojnë që të trajtohen siç duhet ish-krerët e luftës, ndërsa po grumbullojnë firma për ti dërguar si shenjë mbështetjeje. Përfaqësuesit e veteranëve bëjnë thirrje që çdo veprim i institucioneve të jetë në përputhje të plotë me ligjin, duke paralajmëruar se do të vijojnë me protesta nëse nuk merren parasysh kërkesat e tyre.
Situata po përkeqësohet duke pasur parasysh se katër ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi, vazhdojnë të mbahen në paraburgim në Hagë që nga nëntori i vitit 2020. I gjithë ky proces gjyqësor, i nisur në prill 2023, tashmë po zgjatet edhe më shumë, ndërsa të akuzuarit vazhdimisht kanë mohuar akuzat duke u shprehur të pafajshëm. Kjo shtyrje e fundit vjen në një kohë kur Kosova po përballet me tensione të mëdha politike dhe institucionale, ndërsa organizatat e veteranëve dhe qytetarët kanë shprehur shqetësim se gjykata po devijon nga mandati i saj fillestar. Kritikat e OVL-së ndaj Speciales janë shoqëruar edhe me akte proteste, duke përfshirë thirrje për mbylljen e menjëhershme të këtij mekanizmi që ka mbështetjen ndërkombëtare.
Më herët, veteranët e UÇK-së kanë kërkuar që Gjykata Speciale të trajtojë në mënyrë të barabartë gjithë palët dhe kanë shprehur pakënaqësinë që kjo gjykatë nuk po heton krimet serbe ndaj shqiptarëve. Duke parë ashpërsinë e reagimit të veteranëve dhe grumbullimin e mbi 200 mijë firmave, kjo shtyrje e vendimit rrezikon të përshkallëzojë më tej protestat dhe të dëmtojë besimin në institucionet e drejtësisë. Deri në shpalljen e vendimit më 20 korrik, pritet të rritet trysnia mbi Specialen që të përshpejtojë proçesin dhe të sjellë drejtësi sa më parë.
Reagimi nga ana e Kryetarit të Organizatës së Veteranëve të Luftës së UÇK-së, Hysni Gucati:
“Shtyrja e radhës e vendimit për krerët e UÇK-së deri më 20 korrik nga Gjykata Speciale, nuk është asgjë tjetër veçse një vendim i pastër politik dhe një padrejtësi e radhës që rëndon mbi kurrizin e historisë sonë.
Që nga fillimi i këtij procesi, ne nuk pamë, transparencë, paanshmëri dhe drejtësi të vërtetë.Në vend të tyre, pamë vetëm montime dhe padrejtësi të veshura me petkun e ligjit. Po tentojnë të gjykojnë lirinë, por liria nuk mund të prangoset.
Burrat e mëdhenj të kombit, që sot po mbahen padrejtësisht në Hagë, janë vetë dëshmia e sakrificës sonë për ekzistencë.
Mund ta vonojnë, por kurrë nuk do ta mposhtin të vërtetën. Në fund, pastërtia e luftës së Ushtrisë Çlirimtare të Kosovës do të triumfojë mbi çdo intrigë e çdo gjykatë.
Lavdi luftës së pastër të UÇK-së.
Me ju, deri në fitoren e fundit!” – shkruan Gucati në postimin e tij në rrjetin social Facebook.
