Firma e kryebashkiakut Erion Veliaj i është deleguar nënkryetares së Bashkisë për Marrëdhëniet me Jashtë, Anuela Ristani. Tashmë Ristani është kryetare e komanduar e Bashkisë së Tiranës. Firma i është deleguar pasditen e sotme në prani të kryeministrit Edi Rama dhe kreut të Këshillit Bashkiak.
Kryeministri Edi Rama ishte në ambientet e bashkisë, ku zhvilloi një mbledhje me stafet drejtuese, mbledhje e cila zgjati rreth 15 minuta. Vizita e Ramës në Bashkinë e Tiranës është e dyta për ditën e sotme në këtë institucion.
Anuela Ristani është gjithashtu anëtare bordi në institucione të tjera të Bashkisë Tiranë si Rezidenca Studentore Universitare nr.1 në Qytetin Studenti.
Kryebashkiaku Veliaj u arrestua mesditën e 10 shkurtit, pas një hetimi 1 vjeçar. Zyrtarët e SPAK dhe BKH-së zbarkuan në Bashkinë e Tiranës dhe duke i komunikuar Veliajt masën e arrestit, i cili akuzohet për abuzime me fonde publike bashkë me gruan e tij Ajola Xoxa. Gjykata e Posaçme ka lëshuar 5 masa sigurie në kuadër të hetimeve ndaj Veliajt. Për Ajola Xoxën, bashkëshorten e kryebashkiakut, GJKKO ka caktuar masën “arrest në shtëpi”. Ndërsa biznesmenët e implikuar në dosje Gentian Sula, Meriman Palushi, Fatmir Bektashi, Sokol Kryeziu dhe Shkëlqim Fusha janë vënë në detyrim paraqitje.
