Hetuesit e Prokurorisë së Posatçme njoftuan dje se deputetja Klotilda Bushka është vënë nën hetim në kuadër të arrestimit të kryetarit të Bashkisë së Tiranës, Erion Veliaj dhe disa zyrtarëve të tjerë për abuzim me detyrën.
Sot hetuesit zbardhën disa nga akuzat e ngritura ndaj deputetetes Klotilda Bushka, duke thënë se ka penguar hetimet, teksa në dosjen e SPAK del se Bushka ka pasur kontakte me dëshmitarët e thirrur për rastin “Veliaj”.
“Akoma më e rëndë paraqitet situata kur bëhet fjalë për shtetasen Ina Goxhaj, e cila është treguar mjaft e qartë në lidhje me takimet e zhvilluara para se të paraqitej në Prokurorinë e Posaçme, çfarë e ka orientuar shtetasja Ajola Xoxa dhe Klotilda Bushka, si edhe faktin që ka takuar shtetasen Ajola Xoxa dhe Klotilda Bushka pasi ka dalë nga Prokuroria e Posaçme, sipas orarit të lënë nga këto të fundit. Ky takim është dokumentuar nga grupet e vëzhgimit të hetuesve të BKH-së”– lexohet në dosje.
Gjykata ka arritur në konkluzionin se deklaratat e ish-drejtoreshës së BYL-A-s, Ina Goxhaj, kanë qenë të vërteta, pra se asaj i është marrë telefoni për të asgjësuar të dhënat dhe i është dhënë një telefon i ri i llojit IPhone nga Ajola Xoxa.
SPAK pretendon se celulari i shtetases së ndaluar Ina Goxhaj “është asgjësuar me ndihmën e shtetases Klotilda Bushka”.
“Nisur nga deklarimet e shtetases Ina Goxhaj, kësaj të fundit i është kërkuar telefoni, i cili në fakt i është marrë, për t’iu zëvendësuar me një tjetër nga shtetasja Ajola Xoxa. Po ashtu, sipas të njëjtave deklarime, të cilat do të jenë objekt hetimi përgjatë hetimit paraprak, ka dyshime se aparati telefonik celular i kësaj shtetase është asgjësuar me ndihmën e shtetases Klotilda Bushka, në shtëpinë e prindërve të kësaj të fundit” – thuhet në dosjen hetimore.
