Qeveria suedeze po nxit një rikthim të fortë drejt librave fizikë, fletoreve dhe stilolapsave në shkolla, me synimin për të përmirësuar nivelin e leximit dhe shkrimit te nxënësit. Kjo politikë vjen si reagim ndaj rënies së rezultateve në aftësitë bazë, veçanërisht në lexim dhe matematikë. Autoritetet besojnë se reduktimi i përdorimit të ekraneve ndihmon në rritjen e përqendrimit dhe zhvillimin më të mirë të aftësive themelore. Për këtë arsye, janë planifikuar investime të mëdha për sigurimin e materialeve tradicionale mësimore. Gjithashtu, pritet të vendosen kufizime të reja për përdorimin e telefonave në shkolla.
Në praktikë, ndryshimet kanë filluar të zbatohen në disa shkolla, si në zonën e Nacka pranë Stokholmit, ku nxënësit po rikthehen gradualisht te librat dhe shënimet me dorë. Mësuesit po printojnë materialet dhe po reduktojnë përdorimin e platformave digjitale në klasë. Nxënësit ende mbajnë laptopë, por përdorimi i tyre po kufizohet ndjeshëm. Ky tranzicion tregon një ndryshim të qartë nga modeli i mëparshëm i arsimit të digjitalizuar. Suedia, e njohur si një nga vendet më të avancuara në teknologji, po rishikon qasjen e saj arsimore.
Dixhitalizimi i arsimit në Suedi u përhap gjerësisht që nga fundi i viteve 2000 dhe deri në vitin 2015 shumica e nxënësve kishin pajisje personale për mësim. Madje, në vitin 2019 tabletët u bënë pjesë e detyrueshme edhe në arsimin parashkollor. Megjithatë, rezultatet në testet ndërkombëtare kanë rënë vitet e fundit, duke ngritur shqetësime për efektivitetin e kësaj metode. Rreth një e katërta e nxënësve nuk arrijnë nivelin bazë të të kuptuarit të tekstit. Kjo situatë ka shtyrë qeverinë të ndryshojë drejtim dhe të rikthejë metodat tradicionale.
Nga ana tjetër, kjo politikë ka hasur kritika nga ekspertë të teknologjisë dhe arsimit, të cilët paralajmërojnë për pasoja të mundshme në të ardhmen. Sipas tyre, kufizimi i mjeteve digjitale mund t’i lërë nxënësit më pak të përgatitur për tregun e punës. Argumentohet se aftësitë digjitale janë thelbësore, pasi shumica e vendeve të punës në Evropë kërkojnë njohuri bazë në teknologji. Debati mbetet i hapur mes nevojës për përqendrim në mësim dhe përshtatjes me një botë gjithnjë e më digjitale.
